Sooyaalka dahabka ah ee laga soo wariyey Nebi Maxamed nabadgelyo
korkiisa ha ahaate waxyaalaha ugu xiiso badan ee aadk ii jeclaysiiya qofnimadii
uu lahaa, waxa ka mid ah dhaqanka cafiska. Waxa la sheegay dagaalladii uu galay
mid ka mid ah, markii laga soo noqday, Nebiga iyo saaxiibbadii ay hadhgaleen
oo ka nasteen kulaylkii saxaraha. Geed hadhkii ayuu Nabigu (NNKA) jiibsaday,
seeftiisina sudhay korkiisa.
Mid ka mid cadawgii ay is-hayeen baa daba socday oo aan
quusan. Ninkan Maxamed la yidhaa ee dadkii rogay soo qatal ayuu ku talo jiray.
Waa kan fursad helay. Seeftan kor sudhan iyo Maxamedkii uu raadinayey ayuu isla
helay. Markiiba seefta inta uu qaatay buu yidhi “Yaa iga kaa celinaya?” Waa qof
jiifa oo aan hub haysan, waa na nebigii Ilaahay ee ummadda la rabay in uu
gaadhsiiyo diinta.
Nebigu markiiba waydiinta ninka seefta dul haya wuxuu kaga
jawaabay “Ilaahay baa iga kaa celin”. Ilaahay hore ayuu ugu ballanqaaday Nebi
Maxamed in aanu gacan bini’aadam ku dhiman doonin. Ninkii bay seeftii ka
siibatay intii ay wada hadlayeen Nebiga. Dabadeed Nebi Maxamed baa qaatay
markan seefta. Intii in le’eg buu ku yidhi Yaa iga kaa celinaya adiga. Ninkii
wuxuu ku cataabay “Noqo qof seef qaata, ka u wanaagsan”. Nebigu waa uu iska
cafiyey oo ku yidhi iska tag, asxaabtiisiina ku wargeliyey in aanay waxba
yeelin. Cafisku waa dhaqan gobtu leedahay. Gobta gobta ahi.
Dhacdooyin kale oo badan oo qof shalay ka awood badnaa oo si xun yeelay, uu markii dambe se Nebigu helay awood uu si walba yeeli karayey ayuu
cafiyey oo saamaxay. Waayo waxa uu ahaa gobtii aadamaha. Waa astaanta hoggaamiyaha
in uu wax cafiyo marka uu awood helo ee aanu aargoosan.
Xaaji Cabdi Waraabe (AHUN) isaga oo dhallinyar oo nool
waqti qabka iyo faanka iyo aargoosigu sharaf yahay ayaa aabbihii la dilay.
Ninkii Aabbihii uu ugu aareyey ayuu reerku ku tabaabusheeyeen sidii uu u soo
dili lahaa. Waa Cabdi Waraabe markaas iyo saddex nin oo lagu xoojiyey si ay dilka usoo fuliyaan. Qoryo dhuunta gumac u saaranyahay bay sitaan. Cabdi Waraabe ayaa se leh dilka iyo rididda qoriga aabbihii loogu aarayo. Ninkii bay ugu tegeen gurigii. Waa uu gartay oo u loogay, roob da’ayeyna
ka hooyey. Ninkii si wacan buu u soo dhaweeyey.
Markii waagii baryay ee ninkii hawlihiisii ku foofay ayey
dheheen hadda aynu tooganno ninka. Xaaji Cabdi baa yidhi “May”. Waxa uu
Cabdikariim Xuseen markaas go’aansaday in ninka sidaa u sooryeeyay ee roobka
dhibicdiisii u quudhi waayey aanu xabbad u quudhin. Haddii uu u quudho oo dilo,
in aanu aabbihi soo noolaanayn buu ku adkaystay. Raggii kale kii u waynaa baa ka
waaniyey doqonnimadaas in uu iska dhaafo, oo ninka aabbihii ugu aaro. Wuu se ka
diiday Xaajigu. Waayo Xaaji Cabdi waxa uu ahaa gob, gobtuna waayo walba oo ay nooshahay
iyo dhaqan kasta oo ay ku milanto waa tii wax cafisa. Cafisku waa astaanta
hoggaamiyaha, ma aargoosto oo ciilqabe ma aha hoggaamiyuhu ee markuu awood yeesho waxbuu cafiyaa.
Sifahaas nebigu caanka ku ahaa ee wax cafinta buu Xaajiguna
taariikhda ku galay oo marar kaleba noloshiisa laga arkay. Waxa aan Ilaahay uga
baryayaa in uu Xaajiga ku casuumo Jannooyinka, lana kulansiiyo Nebi Maxamed,
innaga sidoo kale kolka aynu geeriyoonno.
Saddaam Xuseen Carab
16 May, 2019
16 May, 2019