Shalay (22.5.2018.) Safar aanu ku tagnay deegaannada
xeebta galbeed ee Somaliland waxaannu casar gaaban gaadhnay deegaanka Gargaara.
Masiibadii duufaanta sabtidii ku dhufatay xeebuhu, waxa ay xanuujisay dadka
deegaanka Gargaara. Lix iyo toban qof ayaa kaga dhigtay daadadkii duufaanta.
Afar iyo toban ka mid ahi laba nin oo ilmaadeer ah iyo qoysaskoodii oo jees
wada deggan bay ahaayeen. Qoys siddeed ah iyo mid lix ah oo aanu midi ka bixin.
Wiilka warbaahintu waraysatay labada qoys midkood buu ahaa, isaga oo dugsiga ku
maqan ayey madhashadu haleeshay qoyskiisa. Waa masiibooyinka ay reebtay
duufaantu.
Casarkii markii aannu gaadhnay degmada, waxa
maydadkooda la helay laba ruux, siddeed kalena ilaa hadda waa la la’yahay.
Maydadka midkood 50KM ayuu ka soo qaaday dooxu halkii uu ka dhuftay. Markii
aannu maydadkii la aasnay, ayey dib u sii bilaabeen raadintii dadkii la la’aa.
Dhul baaxad leh, xeeb kulul, ramadaan la soommanyahay iyo mayd laga raadinayo
meel aan la garanayn dhib ka wayni ma uu jirin. Alle ha ha u soo dhaweeyo
baadidoonkaa murugada badan.
Lughaya dhib ah khasaare bina’aadam ma uu soo
gaadhin. Dhismayaasha dumay, xoolaha ay laysay, iyo beeraha ay galaafatay waxa
ay kala sinnayd deegaannada kale ee ay ka midyihiin Fardolaguxidh, Kilawle, Karura,
Geerisa, Lughaya iyo miyiyada u dhexeeya. Lughaya waxa intaas u dheeraa waa
khadka is gaadhsiinta oo birtii laliska duufaantu legedday.
Beeralay badan oo ku dhaqan deegaannada xeebta ka
xiga Garbadadar oo soo saari jiray khudrad aad u badan daadkii iyo dabayshii
baa xaadhay. Waxa yaable sida aan duufaantu ugu ekaan uun baabinta dalagii, ee
ay dhulkii beeraha ugu rogtay dooxooyin bataax ah oo aan cidi hunguraynayn in
ay dib u beerato. Kumannaan qof ayey ilo dhaqaale iyo shaqo u ahaayeen, masiibooyinka
duufaantu reebtay ku dar.
Dugsiyadii waxbarashada intooda badan iyo goobihii
caafimaadka hooyada iyo dhallaanka ayaa burbur dhisme soo gaadhay. Adeegyadaas
aasaasiga ahna dabcan waa ay hakanayaan haddii aan si kale loo maarayn.
Jidadka baabuurta ayaa ay dhibwayn Iyana ka jirtaa
oo raadka masiibadu reebtay ah. SIlic iyo kadeed ayaa ay baabuurtu ku socdeen
waayo waddooyinkii dooxyo ayey isu rogeen. Meelaha qar gebiyada aan laga gudbi karin,
taas oo dheeraynaysa muddada gaadhista deegaanna. Waa masiibadii duufaantu keentay
iyana.
Intii dhimatay Alle ha u naxariisto, inta maqanna ha
soo dhaweeyo. Waa dhacdo ku waxqaadasho iyo cashar innoo ah.
Masiibooyinku tabaabushe, diyaargaraw iyo gurmad
diyaar ah ayey u baahanyihiin. Alle ha innaga hayo’e, haddii sidan marka la rogmado
uun loogu baraarugo wax la sii saadaalinayey maalmo ka hor, waa ayaan darro iyo
baylahnimo weyn.
Saddaam Xuseen Carab